Tifozët e qindra klubeve europiane bëhen bashkë kundër rifillimit të futbollit. Në një komunikatë të gjatë të nënshkruar nga grupet e organizuara në Europë, kërkohet ndalimi i veprimtarive deri kur të vijë dita që të jetë i mundur rikthimi në stadium.
“Europa është në morsën e koronës. Qeveritë kanë deklaruar kyçjen totale, duke mbrojtur gjënë më të rëndësishme që kemi: shëndeti publik është objektivi i parë për të gjithë. Ndaj e shohim të arsyeshme që të mendohet për një ndalesë më të gjatë të futbollit europian.
Ata që e kontrollojnë futbollin përkundrazi kanë vendosur që në fillim një objektiv: të riniset.” “Jemi të palëkundur në bindjen tonë që në fushë po zbresin vetëm interesat ekonomikë dhe kjo vërtetohet nga fakti se kampionati do të nisë me dyer të mbyllura, pa zemrën e këtij sporti popullor: tifozët!”, lexohet në komunikatë.
