Pas sezonit turistik të verës me moton “Pusho-shqip”, edhe për këtë vjeshtë – dimër kjo është oferta e përbashkët turistike Shqipëri-Kosovë. Kryeministri Edi Rama publikoi sot pamje nga aktiviteti i organizuar ditët e fundit në Prishtinë me pjesëmarrjen e agjencive turistike të të dyja vendeve.
“Turizmi, potenciali ekonomik që nuk njeh kufij. Këtë vjeshtë – dimër “Pusho Shqip”, oferta të përbashkëta turistike Shqipëri-Kosovë”, – theksoi Rama. Në Shqipëri dhe Kosovë ka ende shumë për të zbuluar, ku mund të udhëtosh, të zbulosh, të shijosh, të festosh shqip.
Ministri i Turizmit dhe Mjedisit, Blendi Klosi, në aktivitetin e organizuar në Prishtinë ka vlerësuar kontributin e lartë të shqiptarëve nga Kosova që kanë dhënë për zhvillimin e turizmit në Shqipëri. “Të promovojmë në mënyrë të përbashkët një destinacion që nuk ka asnjë arsye të ketë ndarje nga një kufi administrative”, – tha ndër të tjera Klosi.
Sipas tij, edhe pse ky vit ishte i vështirë flukset e turistëve nga Kosova ishin të pranishëm gjatë gjithë sezonit të verës në Shqipëri. Gjatë sezonit të vjeshtë-dimër turistët nga Kosova mund të vizitojnë muzetë, parqet arkeologjike dhe kalatë e shumta që ndodhen në Shqipëri.
