Presidenti i Serbisë, Aleksandër Vuçiç, i cili ndodhet në Shqipëri në një vizitë dy ditore për të firmosur marrëveshjet më të rëndësishme të “Open Ballkan” u shpreh në një intervistë për RTS-në se paktet që do të nënshkruhen në Tiranë janë bërthama e diçkaje që do të bëjë që kjo pjesë e Evropës të jetë në thelb pa kufij.
Ai komentoi edhe djegien e flamurit serb në protestën që u zhvillua pasditen e djeshme në Tiranë nga Sali Berisha.
“E di që shumica e njerëzve janë të interesuar për atë që do të them për djegien e flamujve dhe se kjo mund të jetë e vetmja gjë që do t’i bëjë ata të ndihen emocionalë.
Por kur shikohet në mënyrë racionale, duhet të shikojmë nga e ardhmja dhe të kuptojmë se kur zemërohen, kur u djegim flamujt, dhe kjo ishte para ardhjes së Edi Ramës në Serbi.
Kjo ndodhi këtu (Tiranë) mbrëmë dhe nuk do të hyj në arsyet e tyre të brendshme partiake. Por sigurisht që është e papranueshme përdhosja e simboleve dhe mendoj se Shqipëria reagoi me shpejtësi, seriozitet dhe përgjegjësi dhe vetë kryeministri Rama”, tha Vuçiç.
Aleksandër Vuçiç theksoi se “Ballkani i Hapur” është një ide e shkëlqyer që do të forcohet.
“Sot ne po nënshkruajmë një marrëveshje për lejet e punës”.
Ai thekson se Ballkani me nismën e re do të jetë më tërheqës për investitorët, sepse nëse i mungojnë punëtorët në Kumanovë, ai do të mund të llogarisë në çdo vend në Serbi ku mund të marrë punëtorë.
“Njerëzit do të lëvizin shumë më tepër, do të kenë mundësi për biznes dhe bashkëpunim” thotë Vuçiç. Paraditen e sotme në Pallatin e Brigadave në Tiranë pritet që të firmosen marrëveshjet mes palëve.
