Gjergji Kohila, ish-shef i Policisë në Sektorin e Luftës kundër Krimit të Organizuar në Vlorë, do të qëndrojë për 8 vite në burg. Vendimi është marrë sot nga Gjykata e Posaçme e Apelit, e cila ka lënë në fuqi vendimin e marrë muaj më parë nga shkalla e parë.
Ai akuzohet se ka shpërdoruar detyrën duke marrë pjesë në disa episode të trafikimit të drogës dhe është dënuar fillimisht me 12 vite burg, por për shkak të uljes së 1/3 së dënimit për shkak të gjykimit të shkurtuar, Gjergji Kohila do të vuajë vetëm 8 vite.
Ish-shefi i Policisë është provuar se është përfshirë në trafikun e mbi 3 ton kanabis nga Shqipëria drejt Italisë, në kuadër të grupit të organizuar kriminal të drejtuar nga Habilajt. Gjergj Kohila, Jaed Çela dhe Sokol Bode ishin tre zyrtarët e policisë të shpallur në kërkim për përfshirje të trafikun e drogës.
Gjykata e Posaçme e Apelit vendosi sot të lërë të pandryshuar vendimin e dhjetorit 2021 për deklarimin e fajshëm të Gjergj Kohilës, për akuzat e “trafikut të narkotikëve” dhe “grupit të strukturuar kriminal”.