Së fundmi, qeveria shqiptare ka bërë të ditur vendimin për të hequr vizat me Federatën e Shën Kristoferit dhe Nevisit. Ky vendim është firmosur nga kryeministri Edi Rama. “Me propozimin e Kryeministrit dhe ministër për Evropën dhe Punët e Jashtme, Këshilli i Ministrave vendosi miratimin e marrëveshjes, ndërmjet Këshillit të Ministrave të Republikës së Shqipërisë dhe Federatës së Shën Kristoferit (St. Kitts) dhe Nevisit, për heqjen e vizave për mbajtësit e pasaportave diplomatike, zyrtare dhe të zakonshme, sipas tekstit bashkëlidhur këtij vendimi”, thuhet në këtë vendim. Federata e Shën Kristoferit ndodhet në detin e Karaibeve dhe përbëhet nga dy ishujt e Shën Kristoferit dhe Nevisit. Sipërfaqja e përbashkët e dy ishujve arrin në 261 km katror, ndërsa mban rekordin si shteti më i vogël në të gjithë hemisferën perëndimore. Popullsia shkon në 55 mijë, ku 92.5% e popullsisë janë me prejardhje afrikane, ndërsa 2.1% kanë prejardhje evropiane. Në indeksin e zhvillimit, Federata e Shën Kristoferit konsiderohet me nivel të lartë, e 72-ta në botë dhe njihet si një parajsë fiskale në Karaibe.
