Vazhdon ende protesta e aktorëve dhe qytetarëve kundër shembjes së godinës së Teatrit Kombëtar. Së fundmi, Guljem Radoja dje bëri një akuzë të fortë ndaj Robert Ndrenikës, duke e pyetur atë se pse ishte shitur. Radoja u kërkoi qytetarëve dhe artistëve që kauza e Teatrit të mos politizohet dhe kolegët të ruajnë nderin e tyre, duke iu referuar dhe aktorit Robert Ndrenika, ndonëse nuk i përmendi emër. Mbi deklaratat e kolegut të tij, ka reaguar së fundmi Ndrenika. Në në prononcim për “Panorama”, Ndrenika nëpërmjet një bisede telefonike ka pohuar se është në gjendje jo të mirë shëndetësore. “Të më falni, por nuk jam mirë me shëndet. Nuk jam mirë. Unë kam bërë disa deklarata më parë, ja merrni ato. Sot e kishin shkruar në një gazetë njërën”, ka thënë Ndrenika. Më pas, aktori i është përgjigjur deklaratës së kolegut të tij. “Mendon se jam shitur?! Epo mirë, le të mendojë ashtu. Por a mund të më thotë se me se jam shitur?! E pra, kam marrë para. I thoni që kam marrë nja 200 mijë euro”, ka thënë me ironi Ndrenika.
