Historia nis në vitin 2024, kur hetuesit italianë bien në gjurmët e një grupi që lëvizte kokainë nga Shqipëria drejt rajonit të Umbrias. Dyshimet i çuan autoritetet në qytetin e Folignos, ku sipas autoriteteve ishte ngritur baza e grupit.
Në krye të skemës dyshohet se qëndronte një shtetas shqiptar, i cili nga Shqipëria organizonte furnizimin me drogë. Në Itali, ai mbështetej nga bashkëshortja e tij dhe dy bashkëpunëtorë të tjerë, një shqiptar dhe një italian.
Ata kishin një restorant në Foligno, në bashkëpronësi të gruas së tij, që dyshohet se e përdornin si fasadë për aktivitetin dhe për të futur në qarkullim paratë e përfituara.
Gjatë kontrollit të së martës, hetuesit, sipas mediave, sekuestruan rreth 68 kilogramë kokainë. Ajo që ra në sy ishte mënyra e paketimit: disa nga pakot mbanin logo të markave të njohura si “Lacoste” dhe “Ferrari”.
Sipas hetimeve, droga shpërndahej në Umbria dhe në zona të tjera të veriut e qendrës së Italisë. Autoritetet kanë dokumentuar mbi 50 raste të lëvizjes së lëndës narkotike.
Anëtarët e dyshuar komunikonin me telefona të koduar, përmes aplikacioneve si Signal, Snapchat dhe FaceTime, si dhe me radio “ëalkie-talkie”. Për transportin përdornin makina me hapësira të fshehura.
Operacioni i së martës në provincën e Perugias çoi në masa sigurie për shtatë persona. Tre janë dërguar në burgun e Capanne, një është në arrest shtëpie dhe tre të tjerë janë shpallur në kërkim.
Pesë nga personat nën hetim janë shtetas shqiptarë, tre prej tyre banues në provincën e Perugias. Një është italian dhe një tjetër me origjinë rumune.
Autoritetet italiane bëjnë me dije se hetimet vazhdojnë dhe se personat e përfshirë konsiderohen të dyshuar deri në një vendim përfundimtar të gjykatës.
