Ekspertja e turizmit, Flora Xhemani Baba, ngre shqetësimin se bizneset që operojnë në turizëm jo vetëm nuk janë ndihmuar nga qeveria por penalizohen vazhdimisht me kontrolle dhe gjoba, por edhe me penalizime absurde si mbyllja e pishinave apo heqja e muzikës.
Me akt normativ, qeveria mbylli lokalet e natës dhe ndaloi muzikën pas orës 20.00 në të gjithë mjediset e shërbimeve të çfarëdolloji me qëllim shmangien e grumbullimit të njerëzve. Por Flora Xhemani Baba thotë se kjo masë dëmtoi vetëm turizmin pasi lokalet e dasmave vazhdojnë punën normalisht. Sipas saj, nuk mund të penalizohet 90% e bregdetit për shkak të lokaleve të natës.
Flora Xhemani Baba: Nëse heqja e muzikës u bë për të shmangur grumbullimin e njerëzve, lokalet e dasmave aktualisht janë plot, asnjë familje nuk e ka anuluar dasmën përkundrazi i bëjnë shtruar, rehat, në ato lokalet e mëdha, ndoshta pa shumë zbukurime të jashtme që të mos kuptohet që lokali punon, por i bëjnë. Njerëzit mblidhen sidoqoftë edhe gjatë ditës, nuk mblidhen vetëm pas orës 20:00 në lokalet live.
Heqja e muzikës si element shoqërues i darkave të pushimeve në resortet shqiptare që nuk është se shquhen për opsione të tjera argëtimi. Shkon në një hotel apo resort në mbrëmje dhe shikon një publik i cili rri në heshtje, bën muhabet apo dëgjon tek kërcasin lugët apo pirunjtë, është e trishtueshme. Një muzikë me volum mesatar nuk besoj se do të mblidhte njerëz, nëse i mbledh nëpër clabe, nuk i mbledh në të njëjtën mënyrë në restorante. Ke penalizuar 90% të bregdetit për një 10% . Mund të mbylleshin clabet dhe nuk ka pse të penalizosh muzokën në një resort ku pushojnë 500-700 veta që kanë nevojë për një atmosferë të gëzueshme. Bizneset nuk janë ndihmuar fare.
