Momenti i ekstradimit të Gëzim Çelës, narkotrafikanti shoqërohet me masa të rrepta sigurie. Pamjet i ka publikuar ministri i Brendshëm, Taulant Balla.
I shumëkërkuari Gëzim Çela, u ekstradua i akuzuar si kreu i një organizate kriminale për trafikim të lëndëve narkotike.
Si rezultat i partneritetit të konkretizuar me shkëmbim intensiv informacionesh, nëpërmjet Interpol Tiranës, dhe me veprime operacionale të përbashkëta, mes Policisë së Shtetit dhe agjencive ligjzbatuese në Kosovë, paraditen e sotme, u bë i mundur ekstradimi në vendin tonë, i shtetasit të shumëkërkuar Gëzim Çela, 56 vjeç, lindur në Fushë Kuqe, Kurbin.
Shtetasi i shpallur në kërkim ndërkombëtar, Gëzim Çela u arrestua më 08.12.2023, në Ferizaj, Kosovë, si rezultat i operacionit të përbashkët të koduar “Fundi i trishtë”, pasi Gjykata e Shkallës së Parë për Krimet e Rënda dhe Korrupsionin i ka caktuar masën e sigurisë “Arrest në burg”, për veprat penale “Trafikimi i narkotikëve” dhe “Mbajtja pa leje dhe prodhimi i armëve, armëve shpërthyese dhe i municionit”.
Ai akuzohet si kreu i një organizate kriminale për trafikimin e lëndëve narkotike, nga Shqipëria në Europë.
Policia e Shtetit tha se do të vijojë intensivisht, punën dhe operacionet e përbashkëta, me partnerët në të gjithë botën, për të lokalizuar, kapur dhe finalizuar ekstradimet e shtetasve të shpallur në kërkim ndërkombëtar.
