Raporti i kredive me probleme u ul sërish në muajin maj duke regjistruar nivelin më të ulët që nga prilli i 2009. Banka e Shqipërisë bën të ditur se, ky tregues zbriti në 8.1%. Në krahasim me fillimin e vitit, huatë me probleme janë ulur me 0.23 % dhe në raport me të njëjtën periudhë të një viti më parë rezultojnë 3.23 % më të ulëta.
Ekspertë bankarë shprehen se rritja e portofolit të kredisë për ekonominë është një faktor tjetër që e ka përmirësuar më tej treguesit e cilësisë së aseteve në portofolin e bankave. Në fund të muajit maj, portofoli i kredisë për ekonominë kishte vlerën e 582 miliardë lekëve, në rritje me 6% krahasuar me të njëjtën periudhë të një viti më parë.
