Lajm i trishtë për botën e muzikës! Mediat ndërkombëtare bëjnë me dije se ka ndërruar jetë në moshën 53-vjeçare për shkak të Covid këngëtari i njohur spanjoll Carlos Marin, pjesë e grupit “Il Divo”. Ai u infektua më datë 7 dhjetor dhe u vendos në intubim dhe kujdes intensiv, por nuk arriti dot t’ia dilte mbanë.
Duke konfirmuar vdekjen e tij në Twitter, grupi tha: “Me zemër të thyer po ju bëjmë me dije se miku dhe partneri ynë, Carlos Marin, ka ndërruar jetë. Ai do t’i mungojë miqve, familjes dhe fansave të tij. Nuk do të ketë kurrë një zë apo shpirt tjetër si Carlos. Për 17 vite ne të katër kemi qenë së bashku në këtë rrugëtim të jashtëzakonshëm të Il Divo-s dhe do të na mungojë miku ynë i dashur. Shpresojmë dhe lutemi që shpirti i tij i bukur të prehet në paqe”.
Marin u bë pjesë e “Il Divo” që nga fillimi i tij në 2003, dhe grupi ka shitur më shumë se 30 milionë kopje të albumeve të tyre në mbarë botën. Grupi gjithashtu konsiderohen si pionierët e popit operistik, ose ‘popera’, dhe koncertet e tyre live kanë shitur më shumë se dy milionë bileta në mbarë botën. Hitet e tyre përfshinin Regresa a Mi (Unbreak My Heart), The Time Of Our Lives dhe I Believe In You, një duet me Celine Dion, si dhe një version të “Hello” të Adele. Ata shitën më shumë se 30 milionë disqe dhe kishin 160 disqe ari dhe platini në më shumë se 33 vende, tha uebfaqja e grupit.
