Jo të pakta kanë qenë rastet kur familjarët nuk respektojnë protokollet e sigurisë anti-Covid duke u bërë kërcënim serioz për shpërthimin e vatrave të reja të virusit. Një neglizhencë serioze e rregullave të Komitetit Teknik të Ekspertëve është edhe përcjellja për në banesën e fundit të familjarëve ku kryhet në prani të shumë personave.
Rasti më i fundit vjen nga Peqini ku familjarët e dy viktimave që kanë ndërruar jetën në spitalet Covid, pas ekzaminimit mjeko-ligjor në morgun e Tiranës, kanë tërhequr trupat e pajetë dhe i kanë dërguar ata në shtëpitë e tyre për të kryer ceremonitë mortore.
Siç raporton gazetari Aldo Kozarja për abcnews.al mësohet se dy viktimat që kanë humbur jetën nga Covid janë nga Peqini të moshës 82 dhe 74-vjeçare Dyshohet se në dy ceremonitë mortore në qytetin e Peqinit kanë marrë pjesë rreth 500 qytetarë. Nuk dihen ende detaje të tjera nga ky episod, që ka bërë të mos respektohet protokolli sigurisë së shëndetit i përcaktuar nga komiteti teknik i ekspertëve.
