Ditën e djeshme UEFA shpalli formacionin më të mirë të vitit, në të cilin për bazë merren votat e fansave dhe paraqitja e futbollistëve në kompeticionet e UEFA-s.
Formacioni që UEFA publikoi ishte me skemën 4-2-4, i ndryshëm nga ai 4-3-3 që përdoret zakonisht. Kaq, ka mjaftuar për mediat britanike të cilat akuzojnë UEFA-n se ndryshoi skemën vetëm për t’i bërë vend në sulm Kristiano Ronaldos.
Sipas tyre më të votuarit e ofensivës ishin Levandovski, Mesi dhe Mane. Ndërsa, CR7 kishte mbetur jashtë.
Megjithatë, UEFA lëvizi skemën dhe përjashtoi një mesfushor. Si rezultat, në mesfushë mbeti vetëm De Brujn dhe De Jong, duke lënë jashtë Ngolo Kante i cili ishte mesfushori i tretë me më shumë vota.
Francezi u penalizua për t’i bërë vend Ronaldos në skemën e pazakontë 4-2-4 e cila ishte përdorur vetëm një herë më parë, në vitin 2017.
Sakaq, ka reaguar edhe një nga zëdhënësit e UEFA-s, i cili ka theksuar se formacioni i vitit është si rezultat i votave të bëra nga ndjekësit por edhe në bazë të arritjeve të futbollistëve në kompeticionet e UEFA-s.
Kështu sipas qeverisë së futbollit, Ronaldo është përfshirë si fitues i Ligës së Kombeve me Portugalinë.
