Zonat me vlera të larta të biodiversitetit kanë nevojë për aktivitete zhvillimi të qëndrueshëm në mënyrë që të gjenerohen mundësi ekonomike, të cilat i shërbejnë banorëve lokal për të fituar të ardhura, pa i dëmtuar vlerat natyrore përreth.
Ky është rasti i fshatit Nartë dhe i komplet zonës së Peizazhit të Mbrojtur Vjosë-Nartë, në të cilat nuk duhet promovuar zhvillimi masiv, si ndërtimi i aeroporteve apo resorteve turistike, por një formë turizmi dhe zhvillimi ekonomik që shkon krahë për krahë me natyrën.
Promovimi i vlerave ekologjike dhe kulturore të Peizazhit të Mbrojtur Vjosë-Nartë është në fokusin e Projektit “Toka e Shqiponjave dhe Kështjellave”, që implementohet nga organizata PPNEA. Festa e Verës është një mundësi e mirë për të promovuar pasurinë kulturore të zonës, ku futet edhe rritja e varietetit të rrushit vlosh dhe kthimi i këtij të fundit në një verë të njohur në të gjithë Shqipërinë.
Festa e Verës në fshatin Nartë bashkoi një mori institucionesh dhe aktorësh lokal, si Administrata Rajonale e Zonave të Mbrojtura Vlore, Bashkia Vlorë, banorë lokal, apo edhe organizata lokale. Ky aktivitet ka si qëllim promovimin e vlerave unike natyrore dhe kulturore të zonës së Peizazhit të Mbrojtur Vjosë-Nartë, si dhe është një mundësi për nxitjen e zhvillimit social-ekonomik në vend.
Ne synojmë që në të ardhmen vetë komuniteti lokal do ta organizojë këtë festë, duke e kthyer në një traditë të mirënjohur në nivel lokal dhe kombëtar. PPNEA prej vitesh është duke punuar për nxitjen e zhvillimit të qëndrueshëm në Peizazhin e Mbrojtur Vjosë-Nartë¸duke promovuar ekoturizmin, agroturizmit, si dhe duke kundërshtuar zhvillimet masive, siç është rasti i ndërtimit të aeroportit ndërkombëtar të Vlorës në Peizazhin e Mbrojtur Vjosë-Nartë.
