Drejtori i Përgjithshëm i Policisë së Shtetit, Ardi Veliu pritet që së shpejti të largohet nga posti që mban. Sipas politiko. al Ardi Veliu do të zëvendësohet nga ish-gjenerali Shpëtim Spahiu.
Po ashtu e ditur bëhet se ky vendim është marrë nga ministri i Brendshëm, Sandër Lleshaj.
Ish-gjenerali që do të zëvendësojë Ardi Veliun ka pasur një karrierë të gjatë në Forcat e Armatosura të Shqipërisë. Spahiu ka qenë komandant i komandës së Shtabit të Përgjithshëm të ushtrisë dhe ka drejtuar po thuajse në të gjitha nivelet.
Kujtojmë këtu se ish-gjenerali ka qenë i akuzuar nga prokuroria për “shpërdorim detyre” në tragjedinë e Gërdecit, në vitin 2008.
Në këtë tragjedi humbën jetën 26 persona. Spahiu ishte një prej ushtarakëve për, të cilët prokuroria kërkoi 8 vite burg dhe 5 vite ndalim të ushtrimit të profesionit në Forcat e Armatosura.
Në vitin 2008, kur ndodhi dhe tragjedia e Gërdecit Spahiu mbante detyrën e komandantit të Forcës së Bashkuar, ndërkohë që akuzën e prokurorisë e konsideroi të pabazuar.
Kurse Ardi Veliu, u emërua në krye të Policisë së Shtetit në shkurt të 2018-ës, nga ish-ministri Fatmir Xhafaj.
