Të pritshëm dhe të turpshëm. Kështu e ka konsideruar avokati i Fredi Belerit, pretencën e SPAK që ka kërkuar 2.6 vite burgim për kryebashkiakun e zgjedhur të Himarës.
Në një prononcim për mediat pas përfundimit të seancës, avokati i Belerit tha se nuk ka asnjë provë, teksa e konsideroi si një fabul të ndërtuar keq.
“Nuk sollën asnjë provë përveç dëshmisë së, Arsen Ramës. Është një e ndërtuar shumë keq si fabul. Edhe ata të 46-ës e ndërtonin më mirë fabulën. Është një akuzë e turpshme, e pritshme. Siç akuzoi edhe Beleri në fillim të seancës për gjykatën, është në vëmendje të Prokurorisë, çfarë të thotë prokuroria. E tërhoqi procesin, rrëzoi të gjitha kërkesat, pasi administroi dëshmitë e rreme të Abdyl Ramës. Do të kishin një foto të Arsenit, jo më Belerit. I gjithë procesi është mbi dëshminë e dy vëllezërve të dy të dënuar.”, tha avokati.
Prokuroria e Posaçme (SPAK) ka dhënë pretencën këtë të martë për kryebashkiakun e zgjedhur të të Himarës, Fredi Beleri, ku ka kërkuar dy vite e 6 muaj burgim nën akuzen për blerje votash. Për të pandehurin tjetër Fredi Kokaveshi, bashkëpunëtor i Belerit, SPAK ka kërkuar dy vite burgim, të cilat i janë konvertuar në 4 vite shërbim prove. Kjo masë lehtësuese për Kokaveshin u dha pasi ai ka probleme shëndetësore, si dhe fëmija i tij i mitur ka probleme shëndetësore.
SPAK e akuzon kryebashkiakun e zgjedhur të Himarës për korrupsion në zgjedhje. Ai u arrestua vetëm dy ditë para zgjedhjeve të 14 majit dhe që prej asaj kohe qëndron në paraburgim, duke mos u lejuar që të betohet si kryebashkiak i Himarës.
